Niðurtalningin er hafin – Bjólfur XVII eftir mánuð🃏🍺🔥

Nú er komið að því aftur. Sautjánda tímabilið hjá Bjólfi, eða einfaldlega Bjólfur XVII, hefst eftir nákvæmlega mánuð og það er óhætt að segja að niðurtalningin sé hafin.

Dagskráin fyrir nýja tímabilið er nú tilbúin og aðgengileg hér:
👉 https://bjolfur.is/mot/naestu-mot/

Þar má sjá öll mótin fram undan, byrja að skipuleggja lífið í kringum það sem raunverulega skiptir máli næstu mánuðina og láta vita ef menn vilja halda mót — þá bætum við því einfaldlega inn á planið…og ekki gleyma að láta betri helmingana vita af þessum dagsetningum og makakvöldinu 😄

Eftir sumarfrí, bústaðarsögur og misgóðar afsakanir fyrir því hvers vegna menn unnu ekki síðast er kominn tími til að stokka spilin á ný. Nýtt tímabil þýðir ný tækifæri, ný blöff, ný bjórstig og auðvitað nýjar sögur sem verða sagðar aftur og aftur yfir spilaborðinu. Hverjir mæta ákveðnir til leiks? Hverjir missa kúlið á endasprettinum? Hverjir næla sér í bjórstig og hverjir mæta alltaf sama hvað gengur á?

Það sem gerir þetta tímabil sérstaklega spennandi er að, ef allt gengur eftir, munum við enda Bjólfur XVII á erlendri grundu. Lokakaflinn gæti, ef enginn heimsfaraldur skellur á, því orðið skrifaður utan landsteinanna, með nýju útsýni, nýju umhverfi og líklega sömu gömlu andlitunum að reyna að sannfæra aðra um að þau hafi verið með bestu spilin pre-flop.

Nú er því bara að hefja upphitunina, dusta rykið af pókerfeisinu, athuga hvort bolirnir passi enn og tryggja að maður sé tilbúinn þegar fyrsta spilið verður gefið eftir mánuð.

Bjólfur XVII er að hefjast — og eins og alltaf verður þetta án efa besta tímabil allra tíma… 🍺😏🃏