Hitað upp fyrir XV

Þá er bara vika til stefnu í að Bjólfur XV hefjist og gott að rifja upp markmið klúbbsins sem sett var af Stofnandanum fyrir um fjórtán árum síðan:

“Markmið klúbbsins er að sem flestir meðlimir hittist einu sinni í mánuði, fái sér nokkra kalda, spili póker og skemmti sér”.

Margt vatn hefur runnið til sjávar síðan þá…og nokkrir bjórar runnið í gegn um Bjólfsbræður líka og nokkrar fleygar setningar sem hafa flogið í gegnum árin tengdar bjór. Á síðasta heimamótinu á síðasta tímabili heyrðist ein fleyg sem ófáir Bjólfsmenn og aðrir hafa sagt í gegnum tíðina: “Ég er hættur að drekka…” nema í þetta skiptið bættist við “…0%”.

Þarna voru kannski einhverjir orðnir leiðir á óáfenga bjórnum?…eða tóku kannski einn þannig eftir að hafa verið í hærri prósentu fyrr um kvöldið?…hver sem ástæðan er þá er allt í boði í Bjólfi og menn drekka bara það sem þeir vilja…enginn að dæma neinn og við skálum fyrir okkur eins og við erum og teljum niður og bíðum spenntir og fullir eftirvæntingar eftir næsta föstudagskvöldi.

Hvort sem menn fái sér áfenga eða óáfenga drykki þá er nokkuð víst að það verður spilaður póker og við munum skemmta okkur eins og markmið klúbbsins segir til um og hefur átt við um öll kvöld okkar saman.